Alþjóðleg leit stendur yfir að hollensku skútunni Laurel sem fór frá Vestmannaeyjum áleiðis til Grænlands þann 8. ágúst síðastliðinn. Einn maður var um borð og hefur ekkert spurst til hans í um mánuð. Íslensk og dönsk yfirvöld hafa árangurslaust reynt að ná samband við manninn.
Þetta kemur fram í tilkynningu frá Landhelgisgæslunni en þar segir enn fremur:
„Undanfarna daga hefur alþjóðleg leit og eftirgrennslan staðið yfir vegna hollenskrar skútu sem hélt frá Vestmannaeyjum þann 8. ágúst áleiðis til syðsta hluta Grænlands, að því er talið er. Einn maður er um borð í skútunni og hefur ekkert spurst til hans frá því hann hélt frá Vestmannaeyjum fyrir tæpum mánuði. Takmarkaður fjarskiptabúnaður er um borð í skútunni, sem ber heitið Laurel, og enginn ferilvöktunarbúnaður. Því hefur það reynst íslenskum og dönskum yfirvöldum ómögulegt að ná sambandi við manninn um borð. Varðskipið Þór og þyrlur Landhelgisgæslunnar hafa svipast um eftir skútunni síðustu daga en án árangurs. Þá hafa flugvélar og bátar danska heraflans jafnframt leitað skútunnar suður og austur af Grænlandi. Sjófarendur eru beðnir um að láta Landhelgisgæsluna vita ef þeir verða varir við skútuna.“
