Kylfingurinn Hlynur Þór Haraldsson lést á heimili sínu þann 2. september síðastliðinn eftir hetjulega baráttu við krabbamein. GKG, Golfklúbbur Kópavogs og Garðabæjar, minnist Hlyns á Facebook-síðu sinni í dag með hlýhug.
„Hlynur Þór var alinn upp í barna- og unglingastarfi GKG og var ágætis kylfingur og með eindæmum högglangur. Hann hafði mikinn áhuga á golfi og gerði golfkennslu af sínu ævistarfi. Hann útskrifaðist sem PGA kennari frá Norska golfkennaraskólanum og hafði þá starfað sem yfirþjálfari hjá Stickstad golfklúbbnum,“ segir í færslu golfklúbbsins.
Hlynur var ráðinn í þjálfarateymi golfklúbbsins árið 2010 og segir klúbburinn að hann hafi verið mikill fengur. „Með þeim hætti aðstoðaði hann fjölmarga GKG-inga við að taka fyrstu skrefin í golfíþróttinni og snart hann hjörtu flestra þeirra sem hann liðsinnti. Við hjá GKG sendum fjölskyldu Hlyns okkar innilegustu samúðarkveðjur.“
