Fjórir leikmenn argentíska landsliðsins í knattspyrnu eru sakaðir um að hafa logið til þess að komast til Brasilíu og spila leik við þjóðina í undankeppni Heimsmeistaramótsins. Þetta segir á vef Daily Mail.
Leikur Brasilíu og Argentínu í undankeppni Heimsmeistaramótins í kvöld var stöðvaður eftir aðeins sjö mínútur af heilbrigðisyfirvöldum og lögreglunni í fyrrnefnda landinu, þar sem leikurinn fór fram. Hann hefur nú verið blásinn af.
Brasilísku lögreglunni hafði verið skipað að vísa fjórum leikmönnum argentíska liðsins úr landi vegna reglna um sóttkví.
Um er að ræða þá Emi Buendia, Emi Martinez, Giovani Lo Celso og Cristian Romero. Allir leika þeir í ensku úrvalsdeildinni.
Þar sem þeir hafa verið í Englandi nýlega hefðu þeir átt að fara í 14 daga sóttkví við komuna til Brasilíu.
Það verður að teljast ótrúlegt að yfirvöld hafi ekki áttað sig á stöðunni fyrr. Það vita jú flestir að leikmennirnir búa og vinna á Englandi.
Samkvæmt Daily Mail þá greindu leikmennirnir aðeins frá því að hafa verið í Argentínu og Venesúela áður en þeir komu til Brasilíu.
