Arsenal hyggst hefja viðræður við knattspyrnustjórann Mikel Arteta um framlengingu á samningi hans eftir tímabilið.

Núverandi samningur Arteta rennur út sumarið 2027, en félagið vill festa hann í sessi, sér í lagi eftir frábært tímabil liðsins. Arsenal er á toppi ensku úrvalsdeildarinnar og komið í úrslitaleik Meistaradeildarinnar í fyrsta sinn í 20 ár.

Arteta hefur stýrt Arsenal síðan 2019 og komið Skyttunum aftur í hóp bestu liða Evrópu. Þrátt fyrir skort á titlum á þessum árum er stjórn félagsins afar sannfærð um að Arteta sé á hárréttri leið og hafa úrslit á næstu vikum ekki áhrif á viðræður um nýjan samning.

Arteta þénar um 10 milljónir punda á ári í dag og munu laun hans líklega hækka við undirskrift nýs samnings.