Kári Árnason var fyrirliði Íslands í 2-2 jafntefli gegn Norður-Makedóníu í undankeppni Heimsmeistaramótsins 2022 í dag. Hann telur frammistöðuna að stórum hluta ekki hafa verið boðlega en sá þó einnig ljósa punkta.
Það gekk lítið sem ekkert upp hjá íslenska liðinu stærstan hluta leiksins. Þeim tókst þó að breyta 0-2 stöðu í 2-2 jafntefli með miklum karakter síðasta stundarfjórðung leiksins.
Brynjar Ingi Bjarnason og Andri Lucas Guðjohnsen skoruðu mörkin.
,,Þetta leit nú ekki vel út á köflum en við sýndum bara góðan anda og karakter að koma til baka og það skiptir máli,“ sagði Kári við RÚV eftir leik.
,,Það er verið að sjá hverjir eru tilbúnir í þetta og svo framvegis. Það voru margir sem komu vel út úr því, sérstaklega í seinni hálfleik. En fyrri hálfleikur var bara skelfilegur, heint út sagt. Við byrjuðum kannski ágætlega fyrstu 10 mínúturnar en hitt, það var ekkert jákvætt við það. Við lágum til baka, þorðum ekki að pressa og þeir fundu bil á milli okkar úti um allt.“
,,Jákvætt að koma til baka. Það voru strákar sem komu inn og stóðu sig með prýði.“
Mikil kynslóðaskipti eru að eiga sér stað hjá landsliðinu um þessar mundir. Kári reynir að hjálpa yngri leikmönnum.
,,Maður er að reyna að hjálpa þeim að fatta þennan leik, þetta er ekkert sjálfgefið. Þetta er allt öðruvísi heldur en klúbbafótbolti. Eins og ég segi, þessi fyrri hálfleikur var ekki boðlegur. Maður er vanur að spila með strákum sem fatta þetta allir, hafa verið í þessu lengi, spilað kannski í kringum 80-90 leiki, þá er þetta svolítið öðruvísi.“
