Nokkuð hefur verið um að fólk hafi séð kóngasvarma að undanförnu en um er að ræða eitt stærsta skordýr sem berst hingað til lands. Kóngasvarmi er stundum kallaður kóngafiðrildi en er í raun mölfluga. Heimkynni hans er á heitum svæðum og hitabeltislöndum, og getur hann flogið á allt að 55 kílómetra hraða.

Einn slíkur kom fjölskyldu í Kópavogi á óvart í gærmorgun þar sem hann birtist á útidyrahurðinni og annar er fastagestur í sumarbústað í Kjósinni.

„Ég hef aldrei séð neitt þessu líkt á Íslandi,“ segir Sigurbjörg Erla Egilsdóttir, bæjarfulltrúi Pírata í Kópavogi. Henni var nokkuð brugðið en börnunum hennar fannst þetta mjög spennandi.

„Ég vissi fyrst ekkert hvað þetta var og hóaði í nágranna okkar, sagði að við hefðum fundið skrýtið dýr sem við hefðum aldrei séð áður. Hann virtist frekar máttfarinn, flaug ekkert heldur labbaði bara um,“ segir hún.

Þau tóku kóngsvarmann síðan með á leikskólann Furugrund til að sýna hinum krökkunum. „Enginn hafði séð svona, hvorki starfsfólk né nemendur. Það merkilega var að fullorðna fólkinu varð bylt við en krakkarnir drógust strax að dýrinu,“ segir Sigurbjörg Erla.

Starfsfólk leikskólans hafði síðan samband við Náttúrufræðistofu Kópavogs þar sem fólk vildi endilega fá kóngsvarmann til sín þar sem hann var sprelllifandi.

Eins og kólibrífugl

Annar kóngasvarmi er orðinn fastagestur hjá Hirti Pálssyni sem á bústað í Kjósinni. Sá kemur í rökkrinu og gæðir sér á blómasafa. Hann sveimar þá kyrr í loftinu eins og kólibrífugl á meðan hann sveigir sogranann ofan í blómið.