FH hefur sent frá sér yfirlýsingu vegna frétta sem bárust í gær, var yfirlýsingin birt á heimasíðu félagsins seint í gærkvöldi. Knattspyrnuvefsíðan Fótbolti.net hafði óskað eftir svörum frá FH vegna ásakana um að leikmaður í meistaraflokki félagsins sé sakaður um nauðgun. Fótbolti.net byggði frétt sína á Twitter færslu sem Hulda Hrund Sigmundsdóttir, meðlimur í aðgerðarhópnum Öfgar setti fram á Twitter síðu sína.
Knattspyrnuhreyfingin á Íslandi situr undir þungum ásökunum þessa dagana þar sem fjöldi meintra kynferðisbrota er til umræðu. „Við getum þó gefið Klöru það að hún sagði satt og rétt frá að hópnauðgunarferlið gekk ekki betur en það að meintur gerandinn er enn í byrjunarliði FH og þjálfar yngri flokka,“ skrifaði Hulda Hrund á Twitter.
Við getum þó gefið Klöru það að hún sagði satt og rétt frá að hópnauðgunarferlið gekk ekki betur en það að meintur gerandinn er enn í byrjunarliði FH og þjálfar yngri flokka.
— Hulda Hrund (@hulda_hrund) August 31, 2021
FH-ingar hafa skrifað yfirlýsingu þar sem félagið segist fordæma hvers kyns ofbeldishegðun. Þá segir að félagið hafi hitt ráðgjafa og fulltrúa ÍSÍ vegna málsins. Þar segir að vinna í þessum málum muni hafa forgang í starfi félagsins.
Yfirlýsing FH:
Aðalstjórn FH er mjög meðvituð um umræðuna um ofbeldis- og kynferðisbrot innan knattspyrnunnar, tekur hana alvarlega og fordæmir hvers kyns ofbeldishegðun. Fulltrúar félagsins hafa hitt ráðgjafa og fulltrúa ÍSÍ, Kolbrúnu Hrund Sigurgeirsdóttur, vegna viðbragða í þessum erfiðu málum og mun sú vinna halda áfram og hafa forgang í starfi félagsins.
f.h. Fimleikafélags Hafnarfjarðar
Viðar Halldórsson
formaður aðalstjórnar