Fyrirsætan Amber Rose sakar kærasta sinn til margra ára, Alexander „AE“ Edwards, um framhjáhald. Hún gerir það opinberlega í færslu á Instagram og segir hann hafa haldið framhjá sér með allavega tólf konum.
Parið á saman soninn Slash Alexander Edwards sem er tæplega tveggja ára.
„Ég er þreytt á því að haldið sé framhjá mér og á að skammast mín fyrir það á bak við tjöldin,“ segir Amber.
„Þið tólf aumingjarnir (sem ég veit af, þið eruð örugglega fleiri) megið eiga hann.“
Amber beinir orðum sínum áfram til kvennanna sem hún segir hafa sængað hjá kærasta sínum. „Þið vissuð að hann væri í sambandi og ætti barn en þið ákváðuð samt að sofa hjá honum. Ég sá öll skilaboðin. Þið voruð fullkomlega meðvitaðar en þið skuldið mér enga hollustu þannig það skiptir ekki.“
Amber nefnir engin nöfn í færslunni. „En þið vitið hverjar þið eruð,“ segir hún.
„Ég get ekki lengur verið sú eina sem berst fyrir fjölskyldu minni. Ég hef verið svo trygg og opin en ég hef ekki fengið það sama til baka. Vanvirðingin og svikin eru fáránleg og ég er komin með nóg.“
Amber gagnrýndi einnig móður sína í annarri færslu. „Sjálfselska móðir mín má líka drulla sér út úr lífi mínu,“ segir hún.
„Ég er orðin þreytt á því að vera andlega og tilfinningalega misnotuð af fólki sem ég elska. Ég hef verið að þjást í hljóði í langan tíma en ég get það ekki lengur. Þess vegna hef ég verið svona hljóðlát. Ég er aðeins skel af manneskjunni sem ég var en ég neita að leyfa einhverjum að eyðileggja mig áfram. Fjölskylda eða ekki.“
