Fyrirsætan Sasha Attwood, kærasta knattspyrnumannsins Jack Grealish, segist hafa fengið 200 morðhótanir á dag á meðan Evrópumóti landsliða stóð í sumar. Grealish lék með Englandi á mótinu.

Attwood fékk skilaboðin í gegnum samfélagsmiðlanna TikTok og Instagram.

,,Þau sögðu ‘ég vona að þú fáir krabbamein og deyjir’ eða ‘ég vona að öll fjölskyldan þín deyji’,“ sagði Attwood. Hún nefndi svo fleiri dæmi um það andlega ofbeldi sem hún varð fyrir.

,,Ég fékk 200 morðhótanir á dag. Ég er ekki að ýkja þegar ég segi það. Ég fékk svo mörg skilaboð á hverjum einasta degi. Ég fæ þau enn í dag.“

Eftir tap Englands í úrslitaleik EM gegn Ítölum fengu þeir Marcus Rashford, Bukayo Saka og Jadon Sancho allir afar ljót skilaboð á samfélagsmiðlum. Leikmennirnir eru dökkir á hörund og notuðu óprúttnir aðilar það gegn þeim. Það kemur Attwood á óvart hversu mikið af illa innrættu fólki er til.

,,Það fór auðvitað allt í háaloft í kringum EM en ég hélt aldrei að þetta yrði svona slæmt. Það kemur mér svo á óvart hversu vont fólk getur verið að ástæðulausu.“

,,Það sem er ógnvekjandi er að þetta eru ungar stelpur. Ég fer á reikninganna þeirra sem eru að senda mér svona hluti og þær eru 13, 14 ára.“

,,Ef þú ert einn af þeim sem býrð til aðganga undir öðru nafni og sendir hræðleg skilaboð, óskar einhverjum dauða, ert að tala um einkalíf þeirra, af hverju? Hvað færðu út úr þessu?“