Eitthvað er á seyði á Enceladus, sem er eitt tungla Satúrnusar. Vísindamenn hafa mælt grunsamlega mikið magn af metani á tunglinu og er magnið svo mikið að ekki er hægt að skýra það með jarðefnafræðilegum hætti.

Í tilkynningu frá vísindamönnunum, sem starfa við University of Arizona í Bandaríkjunum, kemur fram að metanið komi líklegast úr leyndu hafi sem er undir ísilögðu yfirborði tunglsins.

Það var ómannaða geimfarið Cassini sem aflaði gagna um gastegundirnar vetni, metan og CO2 sem koma upp frá tunglinu en það er magn metans sem hefur komið vísindamönnum mjög á óvart.

„Við viljum gjarnan vita hvort örverur, líkar þeim sem eru á jörðinni, „borði“ vetni og framleiði metan og skýri þannig af hverju Cassini mældi svona mikið magn metans,“ er haft eftir Régis Ferriére, lektor í þróunarlíffræði, en hann er meðhöfundur rannsóknarinnar. Hann sagði einnig að gríðarlega erfitt sé að leita að þessum örverum á hafsbotni á Enceladus en það krefst gríðarlegra erfiðra djúpsjávarrannsókna sem verða líklega ekki á okkar færi fyrr en eftir nokkra áratugi.

En Ferriére og samstarfsfólk hans vildi ekki bíða eftir því og notaði því reiknilíkön og gögn frá Cassini til að reikna út líkurnar á hvaða öfl eru að verki á Enceladus. Niðurstaðan er að annað hvort séu það örverur eða óþekkt ferli, sem er ekki þekkt hér á jörðinni, þar sem lífsform koma ekki við sögu.

Rannsóknin hefur verið birt í Nature Astronomy.