Þegar kostnaðarmat var gert vegna byggingar nýs Landspítala á Hringbraut árið 2017 hljóðaði það upp á 62,8 milljarða miðað við verðlag í desember á síðasta ári. Nú er áætlað að heildarkostnaðurinn verði 79,1 milljarður og hefur hann því hækkað um 16,3 milljarða.

Morgunblaðið skýrir frá þessu. Haft er eftir Gunnari Svavarssyni, framkvæmdastjóra Nýs Landspítala, sem er opinbert hlutafélag, að umfang verkefnisins skýri þessa breytingu. Meðferðarkjarninn, sem er stærsta byggingin, verði 70.000 fermetrar í stað 53.000 fermetra. Einnig var ákveðið að gera þá kröfu að húsið geti staðið af sér mun öflugri jarðskjálfta en kveðið er á um í byggingarreglugerðum. Nú sé talið að húsið verði starfhæft nokkrum klukkustundum eftir slíkan skjálfta sem mun líklega eiga upptök sín í Brennisteinsfjöllum.

Um leið og húsið var stækkað urðu veggir þess þykkari en áður var miðað við og því fór meira stál í bygginguna. Samskonar breytingar voru einnig gerðar á 17.000 fermetra rannsóknahúsi sjúkrahússins.

Haft er eftir Gunnari að þessar breytingar eigi stærsta þátt í kostnaðarhækkununum auk verðhækkana á mörkuðum. Að auki hafi verið ákveðið að stækka gatnagerðarverkefnið í kringum spítalann.