Þremur leikjum lauk núverið í 11. umferð Lengjudeildar karla.

Grátlegt fyrir Víking Ó. 

Víkingur Ólafsvík tók á móti Grindavík. Leiknum lauk með jafntefli.

Sigurður Bjartur Hallsson kom Grindvíkingum yfir eftir hálftíma leik. Það var eina mark fyrri hálfleiks.

Harvey Willard fékk tækifæri til að jafna fyrir heimamenn af vítapunktinum á 56. mínútu. Aron Dagur Birnuson í marki gestanna varði þó frá honum.

Emmanuel Eli Keke jafnaði fyrir Víking á 80. mínútu. Kareem Isiaka kom þeim svo yfir á 87. mínútu.

Sigurjón Rúnarsson jafnaði hins vegar fyrir Grindavík í uppbótartíma. Lokatölur 2-2. Svekkjandi fyrir Víking sem var nálægt því að næla í sinn fyrsta sigur.

Grindavík er í þriðja sæti deildarinnar með 19 stig, 3 stigum á eftir ÍBV sem er í öðru sæti. Víkingur Ó. er langneðst í deildinni með 2 stig.

Fram gerði góða ferð í Mosó

Afturelding tók á móti Fram. Toppliðið vann góðan útisigur.

Óskar Jónsson kom Fram yfir þegar tíu mínútur lifðu fyrri hálfleiks. Staðan í hálfleik var 0-1.

Indriði Áki Þorláksson innsiglaði svo sigur þeirra á 75. mínútu. Lokatölur 0-2.

Fram er langefst í deildinni með 31 stig, 9 stigum á undan ÍBV sem er í öðru sæti. Afturelding er með 13 stig í níunda sæti.

Fjölnir sigraði Selfoss

Fjölnir tók á móti Selfoss og vann mikilvægan heimasigur upp á að halda sér í toppbaráttunni.

Ragnar Leósson kom heimamönnum yfir á 7. mínútu. Jóhann Árni Gunnarsson tvöfaldaði forystu þeirra rúmum tíu mínútum síðar. Staðan í hálfleik var 2-0.

Gary Martin minnkaði muninn fyrir Selfoss á 57. mínútu. Nær komust þeir ekki. Lokatölur 2-1.

Fjölnir er í fjórða sæti með 17 stig. Selfoss er í því tíunda með 9 stig, 2 stigum frá fallsvæðinu.