Eigendur járnabindingafyrirtækisins Aflbindingar voru rétt fyrir mánaðamótin dæmdir í skilorðsbundið fangelsi og til greiðslu risahárra sekta fyrir skattsvik og peningaþvætti.
Eigendurnir heita Guðmundur Guðmundsson og Knútur Knútsson. Fyrirtæki þeirra, Aflbinding, á sér glæsta en þyrnum stráða sögu. Forverinn, Aflbinding ehf, varð gjaldþrota árið 2009. Aflbinding fékkst við járnabindingar fyrir staðsteypt mannvirki, eins og segir í frétt Viðskiptablaðsins frá 2014. Stóð Aflbinding að byggingu fjölmargra merkra bygginga, t.d. Höfðatorgs, Háskólans í Reykjavík og Hellisheiðarvirkjunar.
Eftir haustið 2008, á sama tíma og bankakerfið hrundi á Íslandi, fækkaði verkefnum Aflbindingar mikið. Skiptum í þrotabúinu lauk árið 2014, engar eignir fundust í búinu en lýstar kröfur voru upp á rúmlega 63 milljónir. Framkvæmdastjóri Aflbindingar, Knútur Knútsson, sagði við Viðskiptablaðið árið 2014:
„Við vorum búnir að leggja þúsundir tonna í alls konar byggingar. Þetta var komið upp í annað hundrað verkefni. Svo gerist það að haustið 2008 hverfur þetta gjörsamlega allt saman. Við förum úr 140 starfsmönnum árið 2008 niður í átta í desember sama ár.“
Árið 2010 stofnuðu þeir Guðmundur og Knútur fyrirtækið Aflbinding – járnverktakar, en það fyrirtæki hefur nú líka verið afskráð. Guðmundur var stjórnarformaður félagsins en Knútur framkvæmdastjóri.
Þeir félagar voru ákærðir fyrir að hafa ekki staðið skil á virðisaukaskatti fyrir meirihluta ársins 2017, samtals að fjárhæð rúmlega 37 milljónir króna.
Guðmundur var sakaður um að hafa ekki staðið skil á greiðslu opinberra gjalda fyrir rúmlega 29 milljónir og Knútur fyrir um 32,4 milljónir.
Dómur féll í Héraðsdómi Reykjavíkur þann 29. júní síðastliðinn. Voru þeir félagar sakfelldir. Knútur var dæmdur í sjö mánaða skilorðsbundið fangelsi. Hann er jafnframt dæmdur til að greiða 70 milljónir króna í sekt til ríkissjóðs. Ef sektin verður ekki greidd innan fjögurra vikna frá birtingu dómsins þarf Knútur að sitja í 70 daga fangelsi. Má telja líklegt að Knútur þurfi að sitja af sér sektina, án þess að nokkuð verði fjölyrt um það.
Hið sama má segja um Guðmund Guðmundsson sem hlaut einnig 7 mánaða skilorðsbundinn fangelsisdóm. Hans sekt er 66 milljónir og fimmhundruð þúsund. Þarf hann sömuleiðis að sitja 360 daga í fangelsi ef hann greiðir ekki sektina.
