Breska sjónvarpsstjarnan og glamúrfyrirsætan Katie Price segist líta út „eins og skrímsli“ eftir nýjustu fegrunaraðgerðirnar.
Katie, 43 ára, fór nýlega til Tyrklands til að gangast undir nokkrar fegrunaraðgerðir. Hún leyfði tökuliði að fylgja sér og taka upp ferlið sem hún ætlar síðan að deila með aðdáendum sínum á YouTube.
Það sem Katie lét gera í þetta sinn var fitusog um allan líkama, augna- og varalyfting, fitusog undir höku og lét svo sprauta fitu í rassinn.
The Sun birtir myndir af Katie en hún er nær óþekkjanleg á þeim. Aðgerðin var erfið og um tíma var unnusti hennar, Carl Woods, ekki viss um að Katie myndi lifa hana af.
„Hvað í fjandanum hef ég gert?“ segist Katie hafa hugsað eftir aðgerðina.
Katie á fimm börn sem hafa áður átt erfitt með útlitsbreytingar móður sinnar. Í ágúst 2019 var greint frá því að börn hennar grétu þegar þau sáu móður sína eftir fegrunaraðgerð.
„Í alvöru, ég hef farið til helvítis og til baka. Þetta var hræðilegt. Ég leit út eins og skrímsli úr hryllingsmynd,“ segir Katie um nýjustu aðgerðirnar við The Sun.
„Ég hélt að ég myndi deyja […] Mig langar bara í gömlu Katie aftur.“
Katie fór í aðgerðirnar fyrir þremur vikum og hefur verið að jafna sig síðan þá í Tyrklandi.
