Barátta Bjartmars Leóssonar og stuðningsfólks hans við að endurheimta þjófstolin reiðhjól og skyld verðmæti hefur vakið mikla athygli. Rimma Bjartmars og félaga við meintan þjóf sem sakaður er um að hafa stolið MATEX-X rafhjóli að verðmæti 370.000 krónur hefur vakið mikla athygli og verið fjallað um málið í mörgum fjölmiðlum. Um tuttugu manns söfnuðust saman fyrir utan heimili mannsins til að beita hann þrýstingi en einnig til að bregðast við hótunum mannsins í garð Bjartmars.
Lögreglan var kvödd að heimili mannsins en hjólið fannst ekki við húsleit. Málið hefur hins vegar verið upplýst núna og niðurstaðan er óvænt. Hjólið fannst í nokkrum pörtum í nálægð við heimili hins meinta þjófs.
„Fyrst fundust afturdekk, bögglaberi og sæti í töskum ofan í pappagámi hliðina á húsi þjófanna. Svo fannst restin í dag í stórum ruslagámi örstutt frá,“ segir Bjartmar í stuttu spjalli við DV. Hann segir enn fremur að eftir húsleit lögreglu hafi hinn meinti þjófur haft samband við eiganda hjólsins og boðið honum að fá það aftur ef hann greiddi honum 100 þúsund krónur. „Þegar löggan fór þá kom þetta súpertilboð frá þeim,“ segir Bjartmar.
En núna er hjólið semsagt endurheimt, þó í nokkrum hlutum sé. Starfsmaður Rafhjólaseturs Ellingsen hefur boðist til að setja hjólið saman og ganga úr skugga um að allt virki. Eigandi hjólsins er himinlifandi og afar þakklátur þeim sem fundu hjólið hans eftir mikla baráttu. Hann taldi að það væri að eilífu glatað.
