Veikindi herja á leikmenn þýska landsliðsins fyrir leik liðsins gegn Englandi í dag. Um er að ræða leik í 16 liða úrslitum en leikið verður á Wembley.

Ilkay Gundogan miðjumaður þýska liðsins er einn af þeim sem er tæpur eftir höfuðhögg, hann gat æft í hálftíma í gær en fann fyrir mikilli þreytu.

Toni Rudiger hefur ekkert æft vegna veikinda síðustu daga og Robin Gosens varð veikur í gær.

Ekki er um að ræða COVID-19 veikindi en önnur pest herjar nú á þýska hópinn. „Ilkay hefur verið að glíma við höfuðhögg, hann var skárri í dag en hefur fundið fyrir þreytu á æfingum,“ sagði Joachim Löw þjálfari liðsins.

„Við höfum tekið blóðprufu hjá hinum og þeir eru með veirusýkingu, kannski verða þeir betri á einum degi en við vitum það ekki.“