Einn leikur var á dagskrá í kvöld í 7. umferð 2. deildar karla. Haukar tóku þá á móti Njarðvík. Leiknum lauk með jafntefli.
Það sem hæst bar af í fyrri hálfleik var þegar Tómas Leó Ásgeirsson, leikmaður Hauka, fékk rautt spjald. Þetta var annar leikurinn í röð þar sem Haukar missa mann af velli með rautt spjald í fyrri hálfleik. Markalaust var í leikhléi.
Kenneth Hogg kom Njarðvíkingum yfir á 57. mínútu. Það stefndi í sigur gestanna þegar Haukar fengu víti seint í uppbótartíma. Kristófer Dan Þórðarson fór á punktinn en Robert Blakala varði frá honum. Hann fékk þó að taka vítið aftur þar sem Blakala hafði farið af línunni of snemma áður en hann varði fyrra vítið. Kristófer skoraði úr seinna vítinu. Lokatölur 1-1.
Haukar eru með 9 stig í sjöunda sæti. Njarðvík er með 11 stig í öðru sæti. Flest lið deildarinnar eiga þó eftir að leika í þessari umferð svo staðan gæti breyst.
