Auðunn Lúthersson, sem er þekktastur sem tónlistarmaðurinn Auður, hefur undanfarið verið ítrekað sakaður á samfélagsmiðlum um kynferðislegt ofbeldi. Í gær var fyrst fjallað um málið í fjölmiðlum og í kjölfarið birti Auður yfirlýsingu vegna málsins. Yfirlýsingin fór ekki vel í aðra þolendur sem hafa stigið fram á samfélagsmiðlum í kjölfar birtingu hennar.
Í yfirlýsingunni sem Auður birti í gær gekkst hann við því að hafa farið yfir mörk einnar konu. „Árið 2019 fór ég yfir mörk konu án þess að átta mig á því fyrr en við töluðum saman síðar. Ég tók málið alvarlega, baðst afsökunar og reyndi að axla ábyrgð, bæði gagnvart konunni og með því að tala við sálfræðing sem mér var bent á af Stígamótum,“ sagði Auður í yfirlýsingunni en hann þvertók fyrir að aðrar sögur um ofbeldi af hans hálfu væru sannar.
„Ég er staðráðinn í að læra meira af þeirri umræðu sem hefur verið í gangi, bæta hegðun mína og koma út úr þessum sem betri maður. Undanfarnar vikur hafa hins vegar flökkusögur um alvarleg afbrot farið á flug á Twitter sem eiga sér ekki stoð í raunveruleikanum. Ég vona að flestir sjái að svo sé,“ sagði tónlistarmaðurinn.
Nokkrar af hinum svokölluðu flökkusögum sem Auður nefnir eru þó orðnar að beinum ásökunum kvenna sem stíga fram á samfélagsmiðlum. Síðan yfirlýsingin hans birtist í gær hafa nefnilega að minnsta kosti þrjár konur stigið fram á sínum samfélagsmiðlum og sagt að þær séu einnig þolendur hans. Tvær þeirra sem hafa stigið fram á sínum samfélagsmiðlum segja að yfirlýsingin sé eins og blaut tuska í andlitið.
DV hefur ítrekað reynt að ná í Steinunni Camillu, umboðsmann Auðs, vegna málsins undanfarna daga. Var það líka gert við vinnslu þessarar fréttar en án árangurs, líkt og í fyrri skiptin.
