Nokkur Íslendingalið léku í dag og kvöld. Hér er stutt yfirferð yfir leikina:

Alfreð Finnbogason lék ekki með Augsburg sem tapaði 2-1 gegn Stuttgart í þýsku Bundesligunni. Augsburg hefur sogast niður í bullandi fallbaráttu upp á síðkastið. Þeir eru með 33 stig, þremur stigum fyrir ofan fallsvæðið. Þá eiga öll liðin fyrir neðan leiki til góða.

Guðlaugur Victor Pálsson lék allan leikinn fyrir Darmstadt í 1-2 sigri gegn Hannover í þýsku B-deildinni. Liðið siglir lignan sjó um miðja deild.

Aron Elís Þrándarson var í byrjunarliði OB í 1-0 sigri gegn AaB í dönsku Superligunni. Hann spilaði 75 mínútur. Leikurinn var liður í neðri hluta deildarinnar eftir að henni var skipt upp. OB er í þriðja sæti í neðri hlutanum, 3 stigum á eftir AaB sem er efst. Efsta sæti þessa hluta gefur einmitt þátttökurétt í umspili um sæti í UEFA Conference League á næsta tímabili. Sigurinn var því mikilvægur.

Elías Rafn Ólafsson lék allan leikinn í marki Fredericia í 3-0 sigri gegn Köge í dönsku B-deildinni. Liðin leika í efri hluta (e. promotion group) deildarinnar eftir að henni var skipt upp. Fredericia hefur að litlu að keppa fyrir lokaleiki tímabilsins.

Elías Már Ómarsson skoraði mark Excelsior í 2-1 tapi gegn Jong AZ í hollensku B-deildinni. Ein umferð er eftir af deildinni og hefur Excelsior að engu að keppa fyrir hana. Ljóst er að liðið endar í níunda sæti.