Þyrstir Danir settu met á síðasta ári hvað varðar skil á endurvinnanlegum umbúðum. Þeir skiluðu þá 300 milljónum fleiri umbúðum en árið 2019. Ástæðan fyrir þessari aukningu er tvíþætt að sögn Dansk Retursystem sem rekur endurvinnslukerfið.

Þessar ástæður eru heimsfaraldur kórónuveirunnar sem neyddi fólk til að vera meira heima og kom í veg fyrir að Danir gætu skroppið til Svíþjóðar og Þýskalands til að kaupa sér ódýrar drykkjarvörur. Einnig spilar inn í að skilagjald var sett á fleiri umbúðir 2019, þar á meðal á flöskur undir djús og álíka vörur.

2019 skiluðu 1,4 milljarðar umbúða sér inn í danska endurvinnslukerfið en á síðasta ári voru þær 1,7 milljarðar en það er 19% aukning. Skilahlutfallið á síðasta ári var 92% eins og 2019.