Fréttablaðið skýrir frá þessu í dag. Haft er eftir Hrafnkeli V. Gíslasyni, forstjóra stofnunarinnar, að starfsfólki hafi fjölgað talsvert á árinu og muni halda áfram að fjölga á næstu árum. Hann vildi ekki nefna nákvæma tölu starfsmanna.
Á síðasta ári störfuðu þrír hjá sveitinni en samkvæmt fjármálaáætlun á að verja 1,6 milljörðum króna til netöryggismála á næstu fimm árum. Hrafnkell sagðist vonast til að sveitin verði fullskipuð 2023. „Þá getum við verið með vöktun allan sólarhringinn, alla daga ársins. Með mannskap, tækjabúnað og aðstöðu eins og kröfur regluverksins segja til um,“ sagði hann.
Netárásir færast sífellt í aukana en á bak við þær standa netglæpamenn og jafnvel þjóðríki. Í nóvember var stór árás gerð á íslensk fjármálafyrirtæki en árásin lamaði netsamband og kom niður á greiðslu- og auðkennisþjónustu. „Ég hef líkt innleiðingu laganna við að smíða skip og gera sjóklárt. Við erum ekki enn tilbúin til siglingar í mesta öldurótinu,“ sagði Hrafnkell þegar hann var spurður um hvernig sveitin sé í stakk búin til að takast á við netárásir. Hann sagði að tekið væri á þeim málum sem rata inn á borð hennar og þeim sem sveitin finni sjálf. Meginmarkmiðið sé að fyrirbyggja árásir og efla varnir.
Hann sagði að sveitin sé sjálfri sér næg í sumum tilfellum en eigi í samstarfi við erlendar netöryggissveitir, aðallega á Norðurlöndunum, í sumum málum.
