Í þorpinu Castropignano á Ítalíu er nú hægt að kaupa hús fyrir 1 evru en það svarar til um 150 íslenskra króna. Þetta er gert til að laða nýtt fólk til þorpsins sem eins og svo mörg ítölsk þorp glímir við mikla fólksfækkun.

Þorpið er í Molise í suðurhluta landsins. Þar þykir ægifagurt en þorpið er umvafið snæviþöktum fjöllum og gróskumiklum ólívuökrum. Ekki skemmir fyrir að aðeins klukkustunda akstur er til strandarinnar.

Í þorpinu sjálfu eru leifar af miðaldakastala og því um merkan stað að ræða.

Til að fá að kaupa hús á 150 krónur, 1 evru, þurfa kaupendur að skuldbinda sig til að gera endurbætur á húsunum á fyrstu mánuðunum eftir kaupin. Kaupandinn verður að leggja fram 3.000 evrur í tryggingu fyrir því að hann standi við loforð um að gera endurbætur. Upphæðin fæst endurgreidd þegar endurbótunum er lokið. CNN skýrir frá þessu.

Sama leið hefur verið farin í nokkrum öðrum ítölskum þorpum.