Maður sem fæddur er árið 1990 var þann 8. júlí síðastliðinn sakfelldur í Héraðsdómi Reykjavíkur fyrir að hafa stolið sjö sinnum bensíni af bensínstöðvum Olís, sex sinnum árið 2018 og einu sinni snemma árs 2019. Maðurinn dældi eldsneyti á bíl sinn og ók burtu án þess að greiða fyrir eldsneytið.
Oftast gerðist þetta á bensínstöð Olís að Langatanga í Mosfellsbæ.
Maðurinn var einnig ákærður fyrir að hafa nokkrum sinnum ekið undir áhrifum áfengis og annarra vímugjafa.
Hann játaði brot sín skýlaust og var dæmdur í fimm mánaða fangelsi. Ennfremur var honum gert skylt að greiða verjanda sínum rúmlega 100 þúsund krónur og annað eins í sakarkostnað.
Krafist var þess að maðurinn yrði ökuleyfissviptur æfilangt en þeirri kröfu var hafnað.
