Í nýlegu viðtali við bandarískt tímarit segist gamanleikarinn Jim Carrey hafa þjáðst af þunglyndi þegar hann var á hátindi frægðarinnar. Hann segist hafa komist yfir þunglyndið og finni ekki fyrir því lengur. „Ég er stundum hamingjusamur,“ segir hann.

Carrey segist sáttur við lífshlaup sitt, bæði það góða og slæma sem hafi hent hann. Hann er flæktur í dómsmál varðandi lát fyrrverandi unnustu hans, Cathriona White, sem fyrirfór sér árið 2015 með því að taka inn lyf. Samband Carrey og White var stormasamt og hún á að hafa líkt persónuleika hans við Dr. Jekyll og Mr. Hyde og sakað hann um að hafa eyðilagt líf hennar. White var þrítug þegar hún lést. Fyrrverandi eiginmaður White og móðir hennar segja Carrey hafa útvegað henni lyfin sem hún notaði til sjálfsvígsins. Carrey ber af sér sakir og segir White hafa þjáðst af miklu þunglyndi löngu áður en hann kynntist henni og að hún eigi að fá að hvíla í fríði.

Leikarinn sendi nýlega frá sér heimildamyndina Jim & Andy sem segir frá því hvernig hann var í karakter allan tímann sem hann lék í myndinni Man on the Moon þar sem hann fór með hlutverk gamanleikarans Andy Kaufman.