Volgt croissant í morgunmat, confit de canard (andalæri) í hádegismat og af hverju ekki að skola kvöldmatnum niður með góðu rauðvíni? Svona hefur staðan hugsanlega verið á mörgum frönskum heimilum í þá rúmlega fimmtíu daga sem útgöngubann hefur verið í landinu því ekki er annað að sjá en franska þjóðin hafi gert mjög vel við sig í mat og drykk. Að minnsta kosti hefur þjóðin þyngst á þessum tíma.

Stór könnun, sem var gerð fyrir IFOP stofnunina og fréttamiðilinn BFM, sýnir að 57 prósent Frakka hafa þyngst um 2,5 kíló að meðaltali síðan landsmenn voru sendir heim 17. mars og sagt að halda sig heima.

Könnunin leiddi í ljós að það er ekki skyndibitafæði sem hefur freistað Frakka mest í útgöngubanninu. Það eru súkkulaði, kjöt og lystaukar fyrir máltíðir sem landsmenn virðast hafa sótt mest í og það í ríflegu magni ef miða má við baðvogina.

Laurence Plymey, rithöfundur og næringarfræðingur, sagði í samtali við BFM að Frakkar væru líklegast ekki eina þjóðin sem kemst að því þessa dagana að sumarfötin eru orðin svolítið þröng. Það hafi legið ljóst fyrir að fólk myndi þyngjast þegar það neyðist til að vera heima um langa hríð. Margir hafi einnig upplifað pirring eða jafnvel ótta vegna ástandsins og þá sé freistandi að sækja í sykur sem einhverskonar mótefni. Einnig hafi útgöngubannið sett miklar hömlur á möguleika fólks til að hreyfa sig.

En nú horfir þetta vonandi allt til batnaðar því frá og með mánudegi verður byrjað að létta á hömlunum og hyggst annar hver Frakki byrja að borða hollari mat þá og 18 prósent ætla í megrun.