Ríkisstjórn danskra jafnaðarmanna náði í gærkvöldi samkomulagi við stóran hluta þingsins um að létta fleiri hömlum af dönsku samfélagi en ákveðið hafði verið fram að þessu. Í vikunni var fyrsta skrefið stigið þegar skólar og leikskólar tóku til starfa á nýjan leik. Í gærkvöldi náði minnihlutastjórn jafnaðarmanna síðan samkomulagi við aðra flokka um að opna fyrir starfsemi fleiri í næstu viku.

Frá og með mánudegi mega hárgreiðslustofur taka til starfa á nýjan leik, ökukennarar mega hefja kennslu á nýjan leik og sjúkraþjálfarar einnig auk nokkurra annarra stétta. Dómstólar landsins munu einnig taka til starfa á nýjan leik.

Þingflokkarnir komust að málamiðlum um hvaða starfsemi ætti að opna fyrir á nýjan leik og fengu ekki allir óskum sínum framgengt.

Í næstu viku hefjast svo viðræður um hvernig staðið verður að næsta stigi hvað varðar að aflétta þeim hömlum sem hafa verið settar á ýmsa starfsemi í samfélaginu. Mikill þrýstingur er á að leyfa veitingahúsum, kaffihúsum og framhaldsskólum að hefja starfsemi á nýjan leik en heilbrigðisyfirvöld leggjast gegn því eins og staðan er núna.

Danir hafa náð ágætum tökum á útbreiðslu veirunnar og hefur álagið á heilbrigðiskerfið verið mun minna en óttast var. 233 hafa látist af völdum veirunnar til þessa.