Gunnar Lárus Hjálmarsson tónlistarmaður, best þekktur sem Dr. Gunni, vill að erlendir ferðamenn sjái hvernig hlutirnir séu á Íslandi í raun og veru, ekki bara glansmyndir. Birtir hann því mynd af bílastæði Landspítalans í Fossvogi sem hann segir táknrænt fyrir hvernig hlutirnir séu gerðir á Íslandi.

„Mínir erlendu vinir, þið eigið að sjá hvernig hlutirnir eru gerðir á Alvöru Íslandi, bak við heimsku glansmyndina „fara í Bláa lónið“-kjaftæðið – draumaveröldina sem á að heilla þig“

Það sem þú sérð á myndinni er bílastæði Borgarspítalans, annar tveggja stóru sjúkrahúsanna í Reykjavík. Þessi mynd er táknræn fyrir hvernig næstum ALLT er gert á Íslandi. Þessi tiltekni spítali var opnaður fyrir nærri 50 – JÁ FIMMTÍU – árum, þann 28.september 1967. Og bílastæðið er alveg eins í dag og það var þá!,

segir Dr. Gunni. Vill hann vita hvort erlendir vinir sínir þurfi að fara á fjórhóladrifnum jeppa á sjúkrahús í miðri borg, biður hann þá vinsamlegast um að senda myndir ef svo er:

Íslenskir stjórnmálamenn (90% af þeim eru bara að reyna að verða ríkir með einhverju baktjaldamakki) hafa haft FIMMTÍU ár til að malbika þetta bílastæði.

Biðlar Dr. Gunni til Dags B. Eggertssonar borgarstjóra og Óttars Proppé heilbrigðisráðherra um að gera við bílastæðið:

Þið getið meira að segja búið til eitthvað „kjósið mig aftur“-viðburð úr því. Þið getið sagt að malbikið sé fimmtugsafmælisgjöf til spítalans. Eru þið til í þetta eða þurfum við að bíða í aðra hálfa öld eftir að þetta einfalda verkefni sé klárað!?