Síðasti vetur var mildur í Danmörku og það sama má segja um það sem af er yfirstandandi vetri. Snjór hefur ekki sýnt sig í vetur og næturfrost er sjaldséður gestur. Þetta hefur sín áhrif á störf dönsku vegagerðarinnar sem sér um viðhald og rekstur þjóðvega landsins. Saltnotkunin á síðasta ári var sú minnsta síðan 2000.

Vegagerðin sér um 4.000 kílómetra af vegum og notar að meðaltali 58.000 tonn af salti yfir veturinn. Á síðasta ári þurfti bara að nota rúmlega 27.000 tonn. Snjóruðningstækin söfnuðu nánast ryki allt árið en ekki þurfti að nota þau neitt að ráði nema í byrjun árs. Síðast gerðist það 2007 að ekki þurfti að ryðja snjó á seinni helmingi ársins.

En það er ekki þar með sagt að starfsmenn vegagerðarinnar hafi setið auðum höndum og beðið eftir snjó og frosti því þeir hafa haft í nógu að snúast. Sérstaklega vegna þess hversu mikil úrkoma var á síðasta ári. Það hefur séð þeim fyrir nægum verkefnum að tæma vatn úr skurðum og grafa nýja til að leiða vatn á brott frá vegum.