„Þetta er nú meiri hörmungin,“ segir formaður Eflingar, Sólveig Anna Jónsdóttir, um réttlætingar Vinstri grænna fyrir því að hafa gengið í stjórnarmeirihluta með Sjálfstæðisflokknum sem koma fram í nýrri bók um sögu Vinstri grænna. Bókin heitir Hreyfing rauð og græn og er eftir sagnfræðinginn Pétur Hrafn Árnason.

„Það að koma Bjarna Ben í fjármálaráðuneytið er djörf en spennandi ákvörðun, en ekki svik við vinnandi fólk á Íslandi. Það að taka ákvörðun um að ganga á bak stefnu flokksins þíns er að finnast bakþankar leiðinlegir. Það að taka ákvörðun um að húkka upp með forhertu auðvaldi og fólki sem er ekkert annað en útsendarar íslensku auðstéttarinnar er festast ekki í sögulegri hefndarhyggju.“

Þetta sagði Sólveig um útskýringar sem þingmenn Vinstri grænna gáfu í bókinni fyrir samstarfinu. Í bókinni er haft eftir Svandísi Svavarsdóttur að ákvörðun um að fara í samstarfið hafi verið djörf en spennandi ákvörðun og efasemdir hennar um ágæti slíks samstarfs hafi fljótlega heyrt söguni til. „Mér finnst bakþankar leiðinlegir.“

Haft er eftir Steingrími J. Sigfússyni, forseta Alþingis, að ekki ætti að einblína á hlut Sjálfstæðisflokks í hruninu, enda hafi það ekki verið flokkarnir sjálfir, heldur stefna þeirra sem bæru ábyrgð á hruninu og ekki ætti að festast í sögulegri hefndarhyggju.

Sólveig gefur lítið fyrir þær skýringar.

„Hvað heldur Steingrímur J. eiginlega að hann sé? Heldur hann að það sé í hans valdi að láta sem að Sjálfstæðisflokkurinn og Valhöll séu ekki vandamál í samfélaginu, stórkostlegt vandamál sem hefur fætt af sér þá sjúku nýfrjálshyggju sem við erum öll látin lifa við; sjúka græðgi auðstéttarinnar, skattaundanskot til skattaskjóla, endalausan niðurskurð, samræmda láglaunastefnu, sadisma þegar kemur að meðferð á flóttafólki, algjöru skeytingarleysi gagnvart náttúrunni og svo auðvitað óheftri og klikkaðri hernaðarhyggju sem að friðarflokkurinn VG tekur nú þátt í eins og ekkert sé?“

Sólveig segist ekki þekkja hvað söguleg hefndarhyggja feli í sér. Mögulega sé það að muna það sem gerst hafi síðustu áratugi og taka eftir afleiðingunum.

„Þá vil ég bara endilega vera með svoleiðis. En auðvitað er þetta bara bull, eitthvað tilbúið rugl í fólki sem hefur ekki raunveruleg prinsipp, raunverulega stefnu, ranveruleg gildi, rugl í fólki sem hefur ákveðið að völdin sjálf séu það mikilvægasta og pólitík sé hvort sem er bara leikur sem snúist um það hverjir geti sagt mest ósatt.„