Allt stefnir í stórsigur breska Íhaldsflokksins í þingkosningunum sem fóru fram í gær. Um leið stefnir í afhroð Verkamannaflokksins. Enn er verið að telja atkvæði en útgönguspá og þær niðurstöður sem nú þegar liggja fyrir benda til að Íhaldsflokkurinn fái hreinan meirihluta. Þetta þýðir að Boris Johnson, forsætisráðherra, mun geta knúið útgönguna úr ESB í gegn nú í janúar. En skoski þjóðarflokkurinn bætir miklu fylgi við sig og því mun umræðan um sjálfstæði Skotlands væntanlega verða hávær á næstunni en Skotar eru ósáttir við útgönguna úr ESB.

Jeremy Corben, formaður Verkamannaflokksins, tilkynnti í nótt að hann verði ekki í forystu fyrir flokkinn í næstu kosningunum en muni sitja áfram í embætti þar til nýr formaður hefur verið kjörinn.

Um leið og kjörstöðum var lokað birtu stóru sjónvarpsstöðvarnar BBC, Sky News og ITV útgönguspár sem sýndu að Íhaldsflokkurinn myndi fá hreinan meirihluta meirihluta og að Verkamannaflokkurinn myndi tapa 71 þingmanni.

Fyrstu tölur benda til að þessi spá muni ganga eftir og að Íhaldsflokkurinn fái um 368 þingmenn. Það eru þó aðeins færri þingmenn en útgönguspár gerðu ráð fyrir en dugir samt sem áður til að tryggja flokknum góðan meirihluta á þinginu.

Kosningarnar snerust að mestu um Brexit og er ekki annað að sjá en Boris Johnson hafi nú fengið fullt umboð og þingmeirihluta til að ljúka útgöngunni í janúar.