„Þetta er ekki hringtorg, heldur akbraut. Þetta er vissulega torg, en ekki endilega hringtorg þó að það liggi í hring,“ segir Bjarni Brynjólfsson, upplýsingastjóri Reykjavíkurborgar við Morgunblaðið í dag varðandi Hagatorg sem verið hefur í fréttum síðustu daga vegna uppsetningar strætóskýlis þar.
Reykjavíkurborg hefur áður sagt að Hagatorg sé óhefðbundið hringtorg.
Staðsetning strætóskýlisins hefur verið gagnrýnd, enda þurfa vagnstjórar strætó að brjóta umferðarlögin í hvert skipti sem stoppað er fyrir farþegum og mega eiga von á sekt frá lögreglu.
Og ekki nóg með það, því allir þeir ökumenn sem eru á eftir strætisvagni sem stoppar, mega einnig eiga von á sektum, samkvæmt Árna Friðleifssyni aðalvarðstjóra í umferðardeild lögreglunnar á höfuðborgarsvæðinu.
Reykjavíkurborg hefur áður sagt vegna þessa máls, að Hagatorg sé ekki hefðbundið Hringtorg og unnið sé að því að breyta merkingum til að staðfesta þá fullyrðingu.
Hingað til hefur Hagatorg þó verið álitið Hringtorg, jafnvel það stærsta á landinu. Því bera allar umferðarmerkingar á svæðinu glöggt merki, auk þess sem lögreglan hefur staðfest það sjálf.
Strætó ákvað í kjölfar fréttaflutnings að loka biðstöðvunum við Hagatorg, Hádegismóa og Vörðutorg í Hafnarfirði, vegna óheppilegra staðsetninga biðskýla. Segir framkvæmdastjóri Strætó, Jóhannes Svavar Rúnarsson, að beðið sé eftir því hvað Reykjavíkurborg hyggist gera., en lítið hafi verið um kvartanir til Strætó vegna lokunar biðstöðvanna.
Ekki er vitað hvaðan Reykjavíkurborg fær sínar upplýsingar um að Hagatorg sé ekki hringtorg, en samkvæmt Bjarna stendur ekki til að fjarlægja strætóskýlið við torgið. Það stendur því nú ónotað þar sem strætó vill ekki nota það.
Sjá nánar: Löggan mun sekta alla sem stoppa á eftir strætó – Boltinn hjá Reykjavíkurborg
