Framtíð Scott Parker hjá Burnley er í mikilli óvissu eftir að félagið féll úr ensku úrvalsdeildinni.

Burnley félll með 1-0 tapi gegn Manchester City á miðvikudag í síðustu viku og nú er búist við viðræðum milli Parker og stjórnarformannsins Alan Pace um framtíð hans.

Samkvæmt Guardian hefur engin endanleg ákvörðun verið tekin, en Parker er sagður sjálfur óviss um hvort hann vilji halda áfram. Hann á eitt ár eftir af samningi sínum og mögulegt er að aðilar komist að samkomulagi um vinsamleg skil.

Parker tók við Burnley sumarið 2024 eftir að Vincent Kompany fór frá félaginu og stýrði liðinu strax upp í efstu deild á fyrsta tímabili sínu. Endurkoman í úrvalsdeildina reyndist þó erfið og félagið féll beint aftur niður.

Ef Parker fer hefur félagið þegar byrjað að skoða mögulega arftaka. Craig Bellamy, fyrrum aðstoðarþjálfari Burnley, er talinn ofarlega á lista en gæti kosið að halda áfram með velska landsliðið.

Þá hefur nafn Steven Gerrard einnig verið nefnt sem mögulegur kostur, en hann yfirgaf Al-Ettifaq fyrr á þessu ári. Burnley er sagt hafa mikinn áhuga á Gerrard.