Eftir að ný starfsstjórn tók við á Reykjalundi, horfir starfsemin þar til betri vegar að sögn Svandísar Svavarsdóttur, heilbrigðisráðherra á Morgunvakt Rásar 1 í morgun. Sem kunnugt er höfðu allir læknar Reykjalundar nema þrír sagt upp eða verið reknir.

Svandís sagðist ekki hafa skýringar á því hvers vegna óánægjan blossaði upp:

„Því miður get ég ekki farið ofan í saumana á því sem ég skil ekki alveg sjálf. Satt að segja. Þarna virðist hafa búið um sig tortryggni og vantraust á mjög löngum tíma. En ég beindi þeirri ósk til starfsmannanna og þessara nýju stjórnenda að við skyldum það eftir og héldum inn í framtíðina. Af því að þjónustan sem þarna fer fram er óumdeilt með því besta sem gerist. Þarna sé staður sem eigi að setja punkt og horfa til framtíðar.“

Svandís sagðist hafa fundað með starfsfólkinu utan kastljóss fjölmiðla vegna þess hversu viðkvæmt ástandið var:

„Og ég hef þegar heyrt af því að læknar séu byrjaðir að draga uppsagnir til baka.“