Það gleðjast margir yfir komu Costco til Íslands og er lágu vöruverði fagnað á Facebook. Fólk deilir myndum af vörum í gríð og erg á milli þess sem íslenskum verslunum er úthúðað fyrir of hátt vöruverð, nánast aftur í aldir og ganga sumir svo langt að halda fram að verslunareigendur hafi vísvitandi okrað á Íslendingum, bæði í mat og olíu. Vöruverð Costco staðfesti og varpi ljósi á það.
Það eru ekki allir sem hrífast með. Sóley Tómasdóttir fyrrverandi borgarfulltrúi Vinstra grænna sem nú er búsett í Hollandi er alls ekki hrifin og sér ekkert jákvætt við að verslunarrisinn hafi numið land á Íslandi. Segir Sóley að til lengri tíma litið verði áhrifin neikvæð og telur upp fjölmargar ástæður fyrir því.
„Að gleðjast yfir komu Costco til Íslands er soldið eins og að pissa í skóinn sinn. Já, vöruverð lækkar vissulega af því það er kominn risi sem getur boðið vörur á lægra verði, en þegar hann verður búinn að drepa verslanirnar sem áður þóttu stórar mun þessi risi einn ákveða verðið,“ segir Sóley og bætir við að Bónus hafi drepið kaupmanninn á horninu og stórmarkaðir gert út af við sérverslanir.
Sóley uppsker nokkurn stuðning frá vinum sínum á Facebook á meðan aðrir halda fram að hún snúi hlutunum á haus. Skoðun Sóleyjar fellur líklega ekki í kramið hjá flestum Íslendingum en Sóley er þekkt fyrir að vera óhrædd við að fara á móti straumnum.
„Þessi þróun hefur vond áhrif á vöruverð, skipulag, samgönguhætti og mannlíf í byggð til lengri tíma og það verður alltaf erfiðara og erfiðara að vinda ofan af henni. Ok bæ.“