Það hefur væntanlega ekki farið framhjá nokkrum manni að Eurovision stendur nú yfir í Tel Aviv í Ísrael. Ekki eru allir sáttir við að keppnin sé haldin í Ísrael og ekki eru allir sáttir við að úrslitakvöldið fari fram á laugardegi. Strangtrúaðir gyðingar og stjórnmálamenn eru mjög ósáttir við það því laugardagur er hvíldardagur gyðinga og varir frá sólsetri á föstudegi til sólseturs á laugardegi. Þennan dag á að halda heilagan að þeirra mati.

Nokkrir áhrifamiklir rabbínar telja að það að halda Eurovision á laugardegi brjóti hugsanlega gegn hvíldardeginum. Trúaðir gyðingar séu þvingaðir til að vinna á laugardegi og þetta sé hættulegt fyrir veru þeirra í hinu heilaga landi.

Úrslitakeppnin hefst einni klukkustund eftir sólsetur á laugardaginn og brýtur því í sjálfu sér ekki gegn hvíldardeginum en það gerir hins vegar öll hin mikla undirbúningsvinna sem þarf að fara fram á laugardeginum til að undirbúa kvöldið.

Af þessum sökum hafa ísraelsk stjórnvöld gefið út 2.000 undanþágur til að gyðingar geti unnið á hvíldardeginum í tengslum við keppnina.

Ekki er talið óhugsandi að málið geti haft pólitískar afleiðingar fyrir Benjamin Netanyahu, forsætisráðherra, sem reynir nú að mynda nýja ríkisstjórn. Hann hefur átt í viðræðum við fjölda flokka um myndun samsteypustjórnar en í síðustu viku dró UTJ flokkurinn sig út úr viðræðunum vegna allra undanþáganna sem stjórnvöld hafa veitt vegna Eurovision.