Kit Kat er eitt vinsælasta súkkulaði í heimi og minnir helst á súkkulaðihúðað ískex. Það kom hins vegar margt forvitnilegt í ljós í þættinum Inside the Factory á BBC 2 þegar kvikmyndagerðarfólk heimsótti verksmiðju Nestlé, sem framleiðir Kit Kat, í York á Englandi.

Í þættinum kom til að mynda í ljós með hverju Kit Kat væri fyllt. Kit Kat er nefnilega fyllt með niðurmuldum Kit Kat-stykkjum, nánar til tekið þeim sem brotna í framleiðsluferlinu. Litlu er því hent og fara brotnu Kit Kat-in í mulningsvél og eru notaðar sem fylling í súkkulaðið.

Þátturinn var fyrst sýndur árið 2015, en þessar merkilegu upplýsingar um Kit Kat vöktu enga sérstaka undrun þá. Í vikunni fór þátturinn hins vegar á flug á Twitter og fjölmargir netverjar sem höfðu aldrei heyrt að mulið Kit Kat væri notað til að fylla Kit Kat. Velta margir fyrir sér hvernig í ósköpunum fyrsta Kit Kat-stykkið var búið til.

Sjónvarpsþátturinn Today í Bandaríkjunum fór á stúfana, en Kit Kat er framleitt af Hershey‘s í Bandaríkjunum. Yfirmenn hjá Hershey‘s vildu ekki segja nákvæmlega til um hvernig framleiðsluferli súkkulaðisins væri en neituðu því ekki að fyllingin væri sú sama og í Bandaríkjunum.