Katrín Jakobsdóttir forsætisráðherra segir að hún sé mikill talsmaður listræns frelsis en það skipti máli á opinberum vinnustöðum að starfsmönnum sé sýnd nærgætni.

Ólafur Ísleifsson, óháður þingmaður, beindi spurningu til forsætisráðherra á Alþingi í dag um nektarmálverk Seðlabankans, sem hafa verið umtöluð í samfélaginu síðustu daga. Í svari sínu segir Katrín:

„Ég er mikill talsmaður listræns frelsis og tel að við eigum aldrei að skerða hið listræna frelsi. Það er grundvallarsjónarmið í mínum huga.“

Þrátt fyrir að vera hlynnt listrænu frelsi telur Katrín að sama frelsi eigi ekki að gilda um hvar listin sé staðsett. Sé listaverk til sýnis á vinnustað og hafi neikvæð áhrif á líðan starfsmanna þá verði að sýna þeim starfsmönnum nærgætni og tillitssemi.

„Þá finnst mér það vera úrlausnarefni viðkomandi stofnunar, Seðlabankans, að tryggja að listaverk séu til sýnis í þeim rýmum þar sem þau hafa ekki þau áhrif að vera sett í óþægilegt samhengi fyrir viðkomandi starfsmenn.“

Katrín bendir á að í opinberri stofnun eða vinnustað eigi starfsmenn ekki kost á því að forðast rými þar sem stuðandi list er að finna, sjálf sé hún þó með

„Við getum tekið hýpótetísk dæmi um pólitísk skilaboð — ég er með eitt slíkt verk upp á vegg hjá mér. Það stuðar vafalaust einhverja sem þangað koma en það er allt í lagi, þá koma þeir bara ekki aftur heim til mín.“

„En í opinberri stofnun eða á opinberum vinnustað skiptir auðvitað máli að starfsmönnum sé sýnd ákveðin nærgætni.“

Katrín telur óþarfi fyrir Seðlabankann að afhenda listaverkasafn sitt til Listasafns Íslands, enda veiti Seðlabankinn almenningi aðgang að verkunum.