Uppistandshópurinn Mið-Ísland frumsýnir nýja sýningu næsta föstudag og hafa níu sýningar verið settar í sölu. Hópurinn samanstendur af nokkrum af þekktustu uppistöndurum landsins: Ara Eldjárn, Bergi Ebba Benediktssyni, Birni Braga Arnarssyni, Halldóri Halldórssyni og Jóhanni Alfreð Kristinssyni.

Björn Bragi verður með í sýningunni samkvæmt svari Mið-Ísland við fyrirspurn á þá vegu á Facebook-síðu Mið-Íslands. Mun hann þó missa af frumsýningarhelginni þar sem hann verður staddur erlendis.

Björn Bragi hefur haldið sig utan við sviðsljósið síðustu mánuði eftir að myndband af honum, þar sem hann sést áreita unglingsstúlku kynferðislega, fór í dreifingu á samfélagsmiðlum í október.

Atvikið átti sér stað á Subway á Akureyri. Stuttu síðar baðst Björn Bragi afsökunar á framferði sínu, unglingsstúlkan sendi frá sér yfirlýsingu þar sem hún tók afsökunarbeiðni hans gilda.

Málið vakti mikla athygli og fékk Björn Bragi á sig gagnrýni vegna atviksins, í kjölfarið sagði hann sig frá starfi sínu sem kynnir Gettu betur, spurningakeppni framhaldsskólanna, auk þess sem nokkur félög afbókuðu hann sem skemmtikraft á skemmtunum.