Jólamarkaður verður haldinn í Gamla bíó föstudaginn og laugardaginn 21. og 22. desember frá klukkan 15-22.

Alls kyns varningur og góðgæti verða á boðstólum: ilmandi kakó, vöfflur, jólaglögg og fleira ljúfmeti verður í létta jóla-kaffihúsinu sem poppa mun upp í andyrinu. Það verður kósý jólastemning í þessu fornfræga og fallega húsi í hjarta borgarinnar. Á markaðnum mun ægja saman handverki, hönnun, list, framandi varningi og skemmtilegri tónlist. 

Það er Markaðstorg hins himneska friðar í samstarfi við Gamla bíó sem standa fyrir þessum skemmtilegheitum, en þau hafa áður staðið fyrir POPUP mörkuðum víðsvegar um borgina frá því síðsumars, með markaðs uppákomum og gleði fyrir vegfarendur.

Það verða um 20 söluaðilar og listamenn á svæðinu og allir ættu að geta fundið eitthvað fallegt í jólapakkann: íslenska hönnun, skart, list margskonar, handofin silkisjöl frá framandi slóðum, fatnað, ódýrar barnabækur og alls kyns gersemar til að gleðja sína nánustu eða bara sig sjálf.

DJ Sir Dancelot og Kiddi Kanína sjá um ljúfa og hressa tóna til að halda uppi rétta jólaandanum.