Heilbrigðisyfirvöld óttast að heilbrigðisstarfsmaður hafi smitað 440 sjúklinga af berklum á háskólasjúkrahúsinu í Álaborg í Danmörku. Sjúklingarnir og aðrir sem hafa átt í samskiptum við manninn hafa verið kallaðir til rannsókna á sjúkrahúsinu.

Nordjyske skýrir frá þessu. Haft er eftir Michael Brauner, forstjóra lækninga, að þegar í ljós kom í síðustu viku að starfsmaðurinn væri með berkla hafi yfirlæknir lungnadeildar sjúkrahússins verið beðinn um að leggja mat á hvort fleiri gætu verið smitaðir.

Ákveðið hafi verið að taka enga áhættu í þessu máli og því hafi allir þeir, sem gætu hugsanlega hafa smitast, verið kallaðir inn til rannsókna. Blóðprufur eru teknar úr fólkinu og það getur síðan þurft að mæta aftur í blóðprufu eftir þrjá mánuði en það veltur á niðurstöðu fyrri prufunnar.