„Ég vil ekkert tjá mig um þetta mál, ég tjái mig bara í réttarsalnum og þá kemur þetta allt í ljós,“ segir Birgir S. Bjarnason, fyrrverandi formaður Félags atvinnurekenda og núverandi stjórnarmaður hjá Símanum. Héraðssaksóknari hefur ákært Birgi fyrir stórfelld skattsvik.
Um er að ræða undanskot frá skatti upp á tæplega 25 milljónir króna en DV hefur undir höndum afrit af ákæru Héraðssaksóknara. Málið snýst um fyrirtæki Birgis, Íslensku umboðssöluna hf, en hún er hætt rekstri. Birgir er sakaður um að hafa haldið eftir staðgreiðslu launa hjá fyrirtækinu frá hausti 2015, í gegnum allt árið 2016 og fyrir janúar 2017. Staðgreiðslu skatta sem tekin var af launum starfsmanna var ekki skilað í ríkissjóð. Undanskotin fyrir hvern mánuð á tímabilinu nema frá um einni milljón og upp í ríflega tvær milljónir en öll upphæðin leggur sig á samtals 24.669.819 kr.
Brotið telst varða við 1. málsgrein 262. greinar almennra hegningarlaga n. 18/1940, samanber lagagrein frá 1987 um staðgreiðslu opinberra gjalda.
Héraðssaksóknari krefst þess að Birgir verði dæmdur til refsingar og greiðslu alls sakarkostnaðar.
Virtur maður í viðskiptalífinu
Birgir S. Bjarnason gegndi embætti formanns Félags íslenskra atvinnurekenda frá 2013 til 2017. Þar áður var hann framkvæmdastjóri félagsins. Birgir er núna stjórnarmaður hjá Símanum.
