Hópur lækna í Trento á Ítalíu birti nýlega niðurstöður rannsóknar í læknatímaritinu Archives of Gynecology and Obstetrics. Í rannsókninni var fylgst með rúmlega 730 heilbrigðum, ítölskum konum sem stunduðu kynlíf reglulega.

Konurnar sem tóku þátt í rannsókninni voru á aldrinum 18 til 43 ára. Hver kona svaraði sérstökum spurningalista sem er hannaður til að meta kynlíf viðkomandi, til dæmis fullnægingar, hvort kona finni fyrir sársauka í kynlífi, ánægju með kynlíf og kynferðislega örvun. Þá sögðu konurnar læknunum einnig frá því hve oft þær borðuð epli og almennt um matarvenjur sínar.

Konunum var síðan skipt í tvo hópa, út frá því hve oft þær borðuðu epli. Annar hópurinn borðaði að minnsta kosti eitt epli á dag á meðan hinn borðaði ekki epli reglulega.

Samkvæmt niðurstöðum læknanna lifðu þær konur sem borðuðu að minnsta kosti eitt epli á dag betra kynlífi en konurnar í hinum hópnum. Þá kemur einnig fram að epli séu full af andoxunarefnum og pólýfenóli sem geta dregið úr bólgum og bæti blóðrásina. Því halda læknarnir því fram að epli geti talist sem frygðarlyf fyrir konur, líkt og áður hefur verið haldið fram um til dæmis ostrur, rauðvín og súkkulaði.