Bent Høie heilbrigðisráðherra Noregs telur að hugmyndir Íslendinga og Finna um aukið frelsi í áfengissölu geti sett þrýsting á að enda áfengissölueinokun í Noregi og Svíþjóð, hyggst hann taka málið upp á ráðherrafundi Norðurlandanna í maí. Greint er frá málinu í Vårt Land.

Mikið hefur verið rætt undanfarið um áfengisfrumvarpið hér á landi, hafa mörg samtök lýst sig andvíg frumvarpinu sem myndi heimila sölu áfengis í matvöruverslunum líkt og tíðkast víðs vegar í heiminum fyrir utan Noreg, Svíþjóð og Finnland sem hafa sérstakar vínbúðir líkt og við. Í Finnlandi er rætt um að hækka leyfilegt áfengismagn í drykkjum á hillum verslana upp í 5,5% sem og að leyfa krám og veitingastöðum að selja áfengi til að taka með sér. Hefur Bent Høie áhyggjur af að þetta setji þrýsting á norræna kerfið í áfengissölu:

Það eru auðvitað þessi lönd sem ákveða hvað þau gera. Það er samt þannig að Norðurlöndin, fyrir utan Danmörku, hafa staðið saman að þessu áfengissölukerfi. Breytingarnar í Finnlandi draga úr einokun ríksins og þá verða það bara Noregur og Svíþjóð þar sem áfengisverslunarkerfið verður tryggt,

segir Høie. Norðmenn líkt og Íslendingar fengu að halda einokuninni á smásölu áfengis þegar löndin gengu inn í EES, að sama skapi fengu Svíar að halda Systembolaget þegar þeir gengu inn í ESB. Segir Høie það verða erfiðara fyrir Noreg og Svíþjóð að réttlæta sín kerfi gagnvart ESB ef það byrjar að hrynja innan frá, það sé einnig þversögn að þegar Evrópa sé að herða aðgang að áfengi þá séu Norðurlöndin að auðvelda aðgengið.