Þorgerður Katrín Gunnarsdóttir sjávarútvegs- og landbúnaðarmála vill að útgerðin borgi meira fyrir nýtingu sjávarauðlindarinnar og hefur það sem markmið að ná sátt til að hvorki sjávarútvegur né landbúnaður verði bitbein stjórnmálaflokka í aðdragangda næstu þingkosninga, sem verða að öllu óbreyttu árið 2020. Sagði Þorgerður Katrín í Bítinu á Bylgjunni í morgun að hún standi frammi fyrir tveimur stórum verkefnum í sjávarútvegsmálunum:

Stóru verkefnin í sjávarútvegsmálunum fyrir utan endurskoðun á byggðakvótanum til að tryggja meiri byggðafestu í veikustu byggðum landsins, er annars vegar fiskeldið. Við ætlum að marka skýra stefnu í fiskeldinu, þar eru gríðarlega miklir hagsmunir, þetta er atvinnugrein sem er komin til að vera en á móti eru skýrar og sterkar kröfur um að greinin taki tillit til lífríkis náttúrunnar. Við lærum af eigin mistökum, en líka mistökum Norðmanna,

segir Þorgerður Katrín. Nefnd kemur til með að skila skýrslu til ráðherra í sumar og mun hún í kjölfarið kalla til þverpólitísks samráðs um hvernig byggja megi upp greinina:

Talandi um sjómannaverkfall, við erum að horfa á suðurhluta Vestfjarða sem varð ekki fyrir höggi í verkfallinu því þar er komin burðaratvinnugrein á svæðið.

Sannfærð um að hægt sé að ná sátt í sjávarútvegi

Þorgerður Katrín segir að hitt stóra verkefnið sé að ná sátt í sjávarútvegi:

„Það er ekkert tabú, það er naívismi að tala um að það sé hægt. Ég er sannfærð um það að stjórnmálin og allir stjórnmálaflokkar sem hafa komið að því, með sjómönnum og útgerðarmönnum, að byggja upp gríðarlega öflugan sjávarútveg sem að við erum mjög stolt af. Þá eftir stendur að við þurfum að ná sátt um greiðslu fyrir aðganginn að auðlindinni.“

Hefur hún talað við forystumenn allra flokka um að setja á fót nefnd til að komast að niðurstöðu um hvernig greiðslum eigi að vera háttað og hvað útgerðin eigi að greiða mikið:

Sú nefnd mun ekki fá mjög langan tíma því mitt markmið er, í bæði sjávarútvegs- og landbúnaðarmálum, að í næstu kosningum verði hvorki sjávarútvegur né landbúnaður bitbein á milli stjórnmálaflokka, heldur frekar umræða um hvernig við getum haldið áfram að styðja við þessar mikilvægu grunnatvinnugreinar landsins.

Segir Þorgerður hluti af þeirri leið að ná sátt sé að útgerðin borgi meira:

Eftir stendur að við þurfum að skoða þetta í samhengi, annars vegar þarf greinin að halda áfram að ná að fjárfesta, við erum að horfa á gríðarlegar fjárfestingar í togaraflota landsins, ég var viðstödd þegar Kaldbakur kom fyrir norðan, þetta er það sem ég vil sjá, að greinin haldi áfram að fjárfesta.