Gunnar Smári Egilsson ritstjóri Fréttatímans segir framgöngu þingmanna Pírata í áfengismálinu, þá einkum Viktors Orra Valgarðssonar, valda því að fylgi flokksins sé á niðurleið. Fylgi Pírata reis hátt 2015 og framan af árinu 2016, mældist flokkurinn með tæplega 30 prósenta fylgi í mars 2015 og með 43 prósent í apríl í fyrra. Í kosningunum síðastliðið haust fékk flokkurinn 14,48% atkvæða og bætti við sig sjö þingmönnum. Í könnun MMR sem birtist á mánudaginn mældist flokkurinn hins vegar með 11,6% og því orðinn minni en Framsóknarflokkurinn, en þó innan vikmarka.
Líklega er það fyrst og síðast framganga þingmanna Pírata í þessu máli, og þá einkum Viktors Orra Valgarðssonar, sem veldur því að fylgið lekur frá Pírötum þessar vikurnar,
segir Gunnar Smári og bætir við:
Píratar voru á síðasta kjörtímabili farvegur fyrir vilja kjósenda til að gagngerra breytinga á íslensku samfélagi og þó þeir hafi ekki náð því að standa undir því í kosningabaráttunni fengu þeir ágætis kjör. En augljóslega ekki til að standa í svona málum gegn vilja afgerandi meirihluta fólks í stað þess að hafa augun á boltanum, þeim málum sem miklu varða. Píratar eru nú orðnir smærri en Framsóknarflokkurinn, það er viss áfangi.
Viktor Orri hefur verið ötull talsmaður áfengisfrumvarpsins, hefur hann sagt að almenningur eigi ekki að fá að kjósa um einkalíf annarra og því ættu þingmenn að taka þessa ákvörðun.
Ástandið batnar ekki með kynslóðaskiptum á þinginu
Gunnar Smári hefur lengi tjáð sig um skaðsemi áfengis, þá sérstaklega þegar hann gengdi formennsku í SÁÁ fyrir nokkrum árum, ræddi hann meðal annars um hvort samtökin ættu að taka upp nýja stefnu í áfengismálum í stað núverandi stefnu sem er sú að samtökin eru á móti boðum og bönnum í áfengismálum. Í færslu sem hann skrifar á Fésbók í dag segir hann frumvarpið sem myndi heimila sölu áfengis í matvöruverslunum vera varúðarflaut, þingheimur sé úti á túni þar sem gengið sé gegn vilja almennings, vísar hann þar til nýrrar könnunar Maskínu sem sýnir að andstaða landsmanna við sölu léttvíns og bjórs í matvöruverslunum eykst á milli ára. Segir Gunnar Smári ástandið á þinginu ekki batna með kynslóðaskiptum, en metfjöldi nýrra þingmanna tók sæti á þessu kjörtímabili:
Ástandið á þinginu er því ekki að fara að batna með kynslóðaskiptum, heldur versna. Þótt áfengisfrumvarpið verði stöðvað þá er nóg af öðrum málum sem þessir þingmenn munu afgreiða að óskum sérhagsmunaaðila og gegn vilja og hagsmunum meginþorra fólks. Ömurlegt ástand, sem engan enda virðist ætla að taka. Alla vega dugar ekki að kjósa yngra fólk eða ný framboð. Flutningsmenn áfengisfrumvarpsins hafa drepið þann draum.
