Félag framhaldsskólakennara tekur skýra afstöðu gegn fyrirhugaðri sameiningu Tækniskólans og Fjölbrautaskólans við Ármúla þar sem rekstrarform þeirra og áherslur eru ólíkar.

Segir í ályktun Félag framhaldsskólakennara að vinnubrögð sem viðhöfð hafa verið um að það sem kallað er yfirtaka Tækniskólans á Fjölbrautaskólanum við Ármúla séu hörmuð. Stór hópur nemenda og fjöldi starfsfólks bíði nú í óvissu um framtíð sína og því þoli það enga bið að upplýsa ítarlega um framhald málsins. Á Íslandi hafi stefnan verið sú að allir hafi jöfn tækifæri til náms og að menntun sé hluti af velferðarkerfinu en ekki vettvangur markaðsvæðingar. Það sé verulegt áhyggjuefni ef ætlunin er að einkavæða menntakerfið einn skóla í einu, eins og þessi aðgerð ber með sér.

Guðríður Arnardóttir formaður Félags framhaldsskólakennara segir í samtali við Eyjuna að kallað sé eftir rökstuðningi frá stjórnvöldum vegna ákvörðunarinnar:

Okkur líst ekkert á þetta, það þarf að halda því til haga að þetta er einkavæðing.

Segir Guðríður að alþjóðlega kennarasamtök hafi tekið stöðu gegn einkavæðingu með þeim rökum að aukin einkavæðing í menntakerfi bjóði upp á sparnað og aðhald vegna krafna um arðsemi og hagnað.

Framhaldsskólar eigi að vera opinberar stofnanir og að hlutverk þeirra sé að stuðla að alhliða þroska allra nemenda og virkri þátttöku þeirra í lýðræðisþjóðfélagi með því að bjóða hverjum nemanda nám við hæfi, óháð efnahag og félagslegri stöðu. Hætt sé við að þessar hugmyndir fari forgörðum ef þær eru að fullu settar í hendur einkaaðila.

Aðspurð hvort það ætti við í tilviki Tækniskólans, sem sé einkarekinn, þá vildi Guðríður ekki nefna neinn skóla sérstaklega:

Það sem ég sé bara er þessi ákveðna tilhneiging núna að auka einkavæðingu í menntakerfinu. Það eru bara tvö ár síðan að Iðnskólinn var sameinaður Tækniskólanum, nú er verið að sameina Fjölbrautaskólann við Ármúla Tækniskólanum. Við erum með skóla eins og Verslunarskóla Íslands þar sem að skólagjöld eru mun hærri en í ríkisskólunum. Ramminn utan um reksturinn verður ekki eins klipptur og skorinn þegar búið er að færa reksturinn í hendur einkaaðila heldur en þegar hið opinbera er að reka stofnanirnar.