Slæm afkoma á rekstri Strætó á Norðausturlandi hefur leitt til þess að uppsagnarákvæði í samningi Eyþings við Strætó, verður nýtt. Eyþing er landshlutasamtök 13 sveitafélaga á Norðausturlandi, með um 29.000 íbúa. Um 15,000 manns nýta sér þjónustu Strætó á svæðinu og því vandséð hvernig sá hópur háttar sínum samgöngum í framhaldinu.

Að sögn Péturs Þórs Jónassonar, framkvæmdarstjóra Eyþings, er stóraukið framlag frá ríkinu það eina sem geti látið hjól strætó snúast áfram:

„Þetta er því miður staðan. Þetta hefur alltaf verið vonlaust verkefni, það er engan veginn möguleiki á að brúa bilið, þetta hefur verið rekið með halla frá fyrstu tíð. Í upphafi þessa verkefnis árið 2012 útdeildi ríkið rekstrarstyrk til allra landshluta og sú upphæð er einfaldlega ekki að duga hjá okkur. Ef þetta fer úr okkar höndum, sem er líklegast eins og staðan er í dag, þá tekur Vegagerðin aftur við þessu,“

sagði Pétur við Eyjuna.