Heimalagaðar bollur eru ljúffengar. Þessar slá alltaf í gegn á mínu heimili enda einn af uppáhalds réttum fjölskyldunnar. Uppskriftin er einföld en felur í sér smá dúllerí. Þess vegna er frábært að fá sem flesta við borðið til að hjálpast að og gera skemmtilega stemmningu úr þessu. Þessar bollur eru algjörlega þess virði!
1/2 bolli (100gr) brúnar eða grænar linsur
2 msk góð ólífuolía
1/2 rauðlaukur
2 hvítlauksrif
1 stór gulrót eða 2 litlar ca 1/4 bolli
30 gr pekanhnetur
35 gr valhnetur
40 gr panko-rasp, ég notaði glútenlaust frá Lan’s
1/2 tsk oreganó
1/2 tsk basil
1/2 tsk salt
1/4 tsk pipar
1 egg
60 gr mozzarella, rifinn
fersk basilíka
parmesanostur
1 krukka af Classico pastasósu
spagettí, ég notaði glútenlaust frá Garofalo
Byrjið á því að sjóða linsurnar eftir leiðbeiningum á pakkanum. Yfirleitt er það tveir hlutar af vatni á móti einum hluta af linsum.
Á meðan linsurnar sjóða, skerið laukinn, hvítlaukinn og gulræturnar og steikið uppúr góðri ólífuolíu þar til grænmetið er mjúkt og ilmandi. Þá er kryddum bætt útí ásamt salti og pipar auðvitað.
Þegar linsurnar eru tilbúnar er þeim skellt í matvinnsluvél ásamt laukblöndunni, hnetum, panko-raspi og eggi. Þessu er blandað vel saman (gott að notast við „pulse“ takkann).
Mótið 12 fallegar bollur á stærð við golfbolta og komið þeim fyrir í eldföstumóti. Penslið bollurnar með ólífuolíu og bakið inn í 200 gráðum heitum ofni í 20-30 mín eða þar til þær eru orðnar fallega brúnar.
Pasta er þá soðið samkvæmt leiðbeiningum í söltu vatni ásamt slurk af ólífolíu þangað til það er „al dente“ (þétt undir tönn/ekki algerlega fullsoðið).
Þegar bollurnar hafa bakast er pastasósunni hellt útá og mozzarella sáldrað yfir og fatið sett aftur inn í ofn í 10-15 mínútur, eða þar til osturinn er orðinn gullinbrúnn og eldhúsið farið að ilma eins og hrein dásemd.
Skreytið með smáttskornu basil og rífið nóg af parmesan yfir diskinn.
