– Guðmundur Kristjánsson ætlar að flytja fyrirtækið út á Granda
„Við erum búin að samþykkja kauptilboðið en það er með ákveðnum fyrirvörum,“ segir Guðmundur Kristjánsson, forstjóri Brims, aðspurður hvort eigendur sjávarútvegsfyrirtækisins hafi selt Bræðraborgarstíg 16 í Reykjavík þar sem höfuðstöðvar þess hafa verið síðustu tíu ár.
„Það er rétt að við settum húsnæðið á sölu en við erum að fara niður á Fiskislóð 14 en við höfum átt það hús til fjölda ára. Það verður miklu betra að vera þar enda getum við þá einnig verið með netaverkstæði á sama stað,“ segir Guðmundur sem vill ekki gefa kaupverðið upp.
Bræðraborgarstígur 15 er í eigu Fiskitanga hf. Fasteignafélagið B-16 ehf., sem er samkvæmt Fyrirtækjaskrá ríkisskattstjóra alfarið í eigu Guðmundar, á Fiskitanga. Húsið er alls 1.052 fermetrar og nemur fasteignamat þess alls 115,7 milljónum króna. Fiskislóð 14 er 1.992 fermetrar og einnig í eigu Fiskitanga. Guðmundur og bróðir hans, Hjálmar Kristjánsson, eru eigendur Brims.
