Kröfu Lýðs Árna Friðjónssonar um ógildingu lóðaleigusamnings Fríkirkjunnar Kefas í Kópavogi hefur verið vísað frá dómi og bæði kirkjan og Kópavogsbær sýknuð af kröfum hans um viðurkenningu lóðaleiguréttinda. Lýður vill kirkjuna burt af lóðinni og fá að reisa þar sjálfur hús.
Dómur féll í málinu í Héraðsdómi Reykjaness á þriðjudag, þann 5. maí. Héraðsdómur hafði áður sýknað Kópavog og Kefas í maí mánuði árið 2024 en Landsréttur ómerkti dóminn og sendi málið aftur til héraðsdóms.
Málið er flóðkið og nær áratugi aftur í tímann, það er til ársins 1967 þegar Sigurður Hjaltested eigandi Vatnsendajarðarinnar í Kópavogi leigði 3 þúsund fermetra spildu til Jens Þórðarsonar til 50 ára sem svo seldi Margréti Hjaltested landið árið 1987.
Jörðin fór á uppboð árið 1994 og átti Lýður þá hæsta boðið en Kópavogur gerði eignarnám á hluta Vatnsendalandsins um aldamótin. Leigði bærinn Fríkirkjunni Kefas lóð sem náði yfir sama svæði og Lýður vann á uppboðinu.
Hafa Kópavogsbær og Lýður síðan karpað um lóðaleigusamninginn, bætur og réttindi á svæðinu en hinn upprunalegi samningur rann út árið 2017. Lýður vill ógilda samninginn við Kefas, fá lóðina til umráða og byggja þar hús. Hófst málarekstur hans fyrir dómstólum árið 2022.
Í hinum nýjasta dómi segir að Lýður hafi með gögnum og vitnaleiðslum gert það sennilegt að lóðin sem kirkjan stendur á sem sú sama og hann vann í uppboði. Hins vegar hafi uppboðið ekki tekið til beins eignarréttar yfir Vatnsendablettinum og að hann hafi ekki eignast önnur réttindi en þau sem tilheyrðu gerðarþolanum, Margréti Hjaltested. Um hafi verið að ræða óbein eignarréttindi í formi afnotaréttar á grundvelli lóðaleigusamnings en ekki beinn eignarréttur.
„Það gat stefnanda ekki dulist þar sem bæði í gerðarbók sýslumanns og afsali
til handa stefnanda var vísað til þess að um leigulóð væri að ræða,“ segir í dóminum.
Spildan hafi verið tekið eignarnámi af Kópavogsbæ og svæðið skipulagt að nýju. Lýður hafi ekki búið á lóðinni og ekki reist þar mannvirki. Hafði hann þar enga viðdvöl eftir yfirtöku lóðaréttinda.
„Í ljósi alls framangreinds er það mat dómsins að stefnandi hafi ekki fært fyrir því
viðhlítandi rök að lóðarleigusamningur sá er hann reisir rétt sinn á hafi framlengst án
atbeina samningsaðila. Réttindi stefnanda liðu þannig undir lok 4. september 2017
samkvæmt efni samningsins og nýtur stefnandi samkvæmt því ekki lengur réttar yfir
umræddri lóð,“ segir í dóminum.
Eins og áður segir var kröfu Lýðs um ógildingu lóðaleigsamnings Kefas vísað frá og bæði kirkjan og Kópavogsbær sýknuð af kröfu hans um viðurkenningu lóðaleiguréttinda. Var honum gert að greiða Kefas tæplega 1,6 milljón króna í málskostnað en málskostnaður milli hans og Kópavogs fellur niður.
